Məhsul kodu: 1222
Müasir Azərbaycan poeziyasının tanınmış nümayəndələrindən olan şair Firuzə Məmmədli 60-cı illərdə ədəbiyyata gəlmişdir. Bu günədək şairin 30-dan artıq kitabı nəşr olunmuşdur. Onun fəaliyyəti çoxşaxəlidir: 4 monoqrafiyası, 120-dən çox elmi və publisistik məqaləsi çap edilmişdir.
Firuzə Məmmədli filologiya üzrə fəlsəfə doktoru, Azərbaycan Yazıçılar Birliyində Həmkarlar İttifaqının sədridir.
Şeirlərindən nümunələr ingilis, rus, özbək, türkmən, türk, gürcü, Ukrayna, fars, polyak və Koreya dillərinə tərcümə olunmuşdur. Özünün isə rus, özbək, tacik dillərindən bədii tərcümələri vardır. Bir çox türk şairlərinin şeirlərini Azərbaycan dilinə çevirmişdir. Şeirləri beynəlxalq poeziya festivallarında və şeir müsabiqələrində birinci mükafata layiq görülmüşdür. 1992-ci ildə Türkiyədə keçirilən «Türkcənin Uluslararası Şeir Şöləni»ndə «Əlişir Nəvai» baş mükafatı, 2007-ci ildə Beynəlxalq «Rəsul Rza» mükafatı, 2012-ci ildə «Tərəqqi» medalı, 2017-ci ildə «Qızıl kəlmə» mükafatı ilə təltif olunmuşdur.
Şairin 8 cildlik «Seçilmiş əsərləri» çapdan çıxmışdır.
Bu kitabda Firuzə xanımın müxtəlif illərdə qələmə aldığı şeirlərindən seçilmiş nümunələr verilmişdir.
